Plattdüütsch in Hessen (2)

Hamburger Abendblatt, Wochenendausgabe 15./16.03.1986

Lütt beten Platt
mit’t Abendblatt –
die Wochenend-
Plauderei von
GÜNTER HARTE

Plattdüütsch in Südhessen

Achter de Bargen wohnt ok Minschen, sogor in Südhessen! Na, wohen versleit dat in uns mobile Tiet en Noorddüütschen nich, kunnst du frogen, tomool enen/ene mit en besonner Profeschoon, de dor ünnen mehr froogt is as hier.

Man dat de denn tosomenfindt, en Vereen gründt un de plattdüüsche Sprook in de Merrn stellt – dat is doch wat.

Kennenlehrt harrn sik en poor Noorddüütsche in’n Dänisch-Kurs, un bi dat gammel Dansk weer jem bifullen, se kunnen sik hier in dem Frömm doch ok mit ehr oll Heimootsprook befoten.

Mit söben Lüüd hebbt se in Roddgau en Vereen gündt („… zur Erhaltung und Förderung der niederdeutschen Sprache“), un de Andrieber Heino Küster, de in Frankfurt bi de Flugsicherung arbeit, hett allens in de Hand nohmen, hett Rekloom mookt, in Funk un Bläder von jemehr Sook vertellt, hett bi de Volkshoochschool en Plattdüütsch-Kurs rutslogen un sülm hollen, harr dor wohrhaftigengotts glieks öber twintig Heurers. – He harr sik vorher hier boben bi’t Institut für niederdeutsche Sprache (Bremen) un bi enkelte Lüüd befroogt, wat op düt Flach allens so los is un wo’n mit un no arbeiten kunn, un denn hett he losleggt…

Nu letzten Sünnobend hebbt se op’n Hauptversammeln ehren 1-jöhrigen Gebortsdag fiert. Ut de söben Moten sünd nu al söbentig (!) worrn, un to de rein plattdüütschen sünd ok welk tokomen ut Hessen, de uns Sprook un dat gesellige Leben in düssen Vereen möögt. Een Amerikoner is dor ok bi, de den Klang von’t Plattdüütsche so geern mag (un do so’n Heft mit schreben Schrift von sienen Oorgrootvadder den villicht doch mol von’t Nedderdüütsche in’t Düütsche oder Ingelsche öbersetten kann).

De Gebortsdag fung mit’n plattdüütschen Gottesdeenst (Paster Köppen, Kappeln) nomeddags an un holl loot an’n Obend mit’n Lesung op (Günter Harte).

As Heino Küster mit sien Gäste-Book ankeem, do heff ik dor ü.s. dat oll Woort rinschreben: Doon is’n Ding – snacken köönt wi all! Denn dat, dücht mi, weer bi Käppen Küster un sien Lüüd, de ehren Vereen nu den Nomen „Plattdüütsch leevt“ geben hebbt, mol wedder ganz düütlich worrn…